nan mambaonyo dari Bukiktinggi. Parudin baru kini pulang kakampuangnyo salamo duo puluah taun inyo marantau. Tadi dari Padang dicubonyo pulo naiak oto travel, angkutan nan kaba nyo paliang laku kini disiko.Sambie manenteang tas kopor, si Parudin balari-lari anjiang, manuruni labuah kampuang tu. Daulu sangkek
ketek, disinan awanyo acok balari-lari nan bak nantun. Makonyo kini sambie mangana-ngana maso Kaciak saisuak tu, inyo balari-lari pulo baliak. Tapi kini nampak labuah tu labiah samak dek rumpuik nan banyak bitumbuah. Indak sarancak jo sabarasiah bantuak daulu lai. sabana sanang nampak hati si Parudin, malapeh taragak…..Sakali-sakali dakek kelok, dipiciangkannyo matonyo…..- Disubaliak kelokko, disabalah kida jalan
ado batang langsano………Kecek Parudin dalam hati. Katiko dibukaknyo
incek matonyo baliak…. Iyo masih ado batang langsano, parsis cando duo puluah taun nan lapeh. Tunyo kini batang kayu tu batambah gaek, lah banyak urek gadang-gadang menyumbue ditanah dipangka nyo.Dikelok nan ciek lai, dipiciangkannyo pulo matonyo baliak……
- ……disabalah suok, ditapi labuah ko….. ado batu gadang……..
Katiko matonyo dibukaknyo pulo….. iyo batu gadang tu masih cando saisuak juo baru, tasanda kaparik ditapi labuah tu…… Aratinyo bana dalam duo puluah taun ko iyo indak barubah kampuangnyo tu doh….
Dikelok sasudah itu, dipiciangkannyo pulo matonyo sakali lai……
- Dibawah labuahko, agak turun
sangenek,…. ado kantue kapalo desa………Iyo………masih ado kantue tu, hanyo mereknyo nan
alah batuka: kalau daulu mereknyo “KANTOR KAPALA DESA”, nan kini bamerek “KANTOR KEPALA NAGARI”. Dicaliaknyo urang sadang rami di halaman kantue tu. Ado induak-induak nan manyalingkik-nyalingkik mancigok dari jandela,…. Ado nan tagak-tagak sajo sambie maota……Ado aaaa garan ko kini? Tanyo si Parudin dalam hati.Didakek i nyo lah
surang laki-laki nan bakupiah sebo, manyandang kain saruang, nan sadang asik maheruik paisok daun anau, sampai kempuih pipih nyo. Katiko si Parudin mandakek, urang tu mambulalang ka inyo. Tabik lo kuncun si Parudin dek takajuik…….. Sambie mambulalang, ditunjuaknyo dakek ka hiduang si Parudin bana… dek urang tu.- …. Waang…. Parudin yo?
Urang tu batanyo sambie tatap mambulalang. Nan si Parudin maangguak-angguak balam, tagagik-gagik.
-
Coga waang kini mah….? Bilo tibo?Baru
takana dek si Parudin mancaliak ado kalimumuik dakek suduik bibie urang tu. Kalimumuik tu kini agak tasaok dek sisunguik nan tumbuah marantiang……- Hoih…..Si Nawin ko mah……?
- Iyo awaden…… lupo ang yo….. ha, ha, ha…..
Dipaguiknyo si Nawin tu dek si Parudin.
baa ka indak: Si Nawin ko kawan areknyo samo mangaji di Surau Tinggi daulunyo. Tapi kini bantuaknyo alah banyak barubah. Sisunguiknyo tumbuah jarang, tapi marantiang. Bakupiah sebo pulo…. Sambie manyandang kain saruang….. maisok daun anau…. babaju kauih putiah cap lado, tapi alah manguniang dek tuo…… kok sarawa dari kain batiak alah agak puda, ……..bakulenseangkan pulo hinggo lutuik…….heee awanyo baru pulang dari ladang tantu iyo, baa indak kalupo si Parudin?Diiriknyo lah tangan si Parudin kabawah batang
piraweh disuduik laman kantue tu. Kaduonyo mancangkuang disinen sambie bagalak-galak malapeh taragak.- Co lah paisok rantau tu stang……
Kecek si Nawin pulo. Dek si Parudin bakaluakan lah rokok Sansu sabungkuih dari sakuihnyo…..Nan sabananyo si Parudin ko indak maisok bagai doh, tapi inyo tau bana baraso dikampuangnyo tu, rokok adolah alaik komunikasi nan nomor satu.
- Rokok ang samo sen jo rokok
siko ko nyoh Din….. di lapau si Katik banyak ko di jua urang ….- Iyo isok senlah taro…… kan perai tu…..
Nyon si Parudin lo mampagarahkan
kanti nyo nan langsuang mamasuakkan labiah rokok tu kadalam sakuih, sambie galak sengeang..- Sabananyo, manga urang bi rami dikantue ‘nyiak wali ko?
- Biaso…Ado
paja nan mancilok ayam,…tatangkok..itu nan diopareso dek nyiak wali.- Ka baukun paja tu?
- Tantu iyo…. Maliang mah….. tantu iyo di ukun….
mandaguik si Parudin sakutiko, karano takana dek inyo, kini banyak urang nan korupsi gadang, indak batangkok jo bapareso bagai doh…..jan lai ka baukun…… Bapadiakan samiang lapeh nyoh. Tapi di kampuang ko, ayam sen nan dicilok urang,…. langsuang batangkok jo ba ukun.- Kalau hanyo maliang ayam…..
anto nyiak wali bana ‘lo nan mamareso?- Iyo lah…. Ka bacando urang disurek kaba tu toh di ang? Nan maliang
pitih nagara tu?...... bapadia kan samiang?Agak takajuik si Parudin. Tarnyato si Nawin ko lai maikuti pulo masalah korupsi sagalo macam tu bagai……. Tapi indak heran…… dek
dima-dima dikampuang tu kini alah banyak nan ba tipi. Malah di babarapo rumah nampak pulo antene parabola, bak cando kuali gadang ta tingadah.- Baa ‘lo tu di ang Win? Nan paja ko maliang ayam…. Batangkok dek nyiak wali….. nan maliang pitih nagara indak……
Si Parudin jadi ingin tau, baa pulo pandangan jo reaksi urang kampuang kapado kasus korupsi nan sadang jadi barito
Angek kini tu?.- Haa, danga di ang:…. Paja ko mancilok ayam
inyiak Langkamin duo ikue….. nan ayam inyiak Langkamin ko hanyo ampek ikue…. Jadi sapaduo nan diciloknyo….Patuik kanai ukun….. Tapi nan pitih nagara tu……. Baratuih triliun mah…. Dimaliang agak saratuih miliar…. Kan kenek tu nyoh….. mangko nyo indak kanai ukun doh……..Takakah galak si Parudin mandanga…..Iyo pulo tu… logika si Nawin iyo tapek, kalau diukue jo prosentase aaa nan dimaliangnyo. Maliang ayam….50%. Korupsi…… 0,01%.
- Haaaa…. Iyo tekan den di ang…. Patuiknyo waang ko nan jadi mantari ko Nawin…… Sakurang-kurangnyo jadi pangacara lah…waang nan tapek….
- Cimpurin di ang……
aden ko kini alah jadi pambajak, …. Ka jadi mantari lo taroh….. waden bangga jadi pambajak ko diang…..…. , dek karano pambajak ko lah padi manguniang ………..jaguang maupiah…….- Iyo lo mah…… pambajak sawah, pambajak ladang……. Lai indak jadi pambajak kapa tabang………….
Walaupun bagarah, tapi dek si Parudin taraso “dalam” arati
garah jo kanti lamo nyo tu…. Sabagai anak mudo nan badomisili dikampuang nan jauah tapancie tu, tanyato si Nawin indak katinggalan barito…… Itu lah kalabiahan kamajuan tehnologi informasi kini,….. pikie si Parudin. Bantuak pandangannyo tantang urang maliang ayam duo ikue nan harus di ukun, dibandiangkan jo nan maliang miliaran…….. balapehkan….. itu adolah “logika pembenaran” …..….. “pembenaran” nan didapek dari urang nan tingga di kampuang tapancie…… hebaik si Nawin, pikie Parudin.- Aaa biasonyo ukunan dari nyiak wali tu Win…..?
- Biasonyo….. kalau indak mambarasiahkan labuah kampuang salamo sabulan, kok indak mambarasiahkan laman surau sabulan panuah pulo……..
Si Parudin maangguak angguak cando lai mangarati. Nan jaleh sajak hari tu inyo dikampuang, alah bateong-teong sapanjang hari jo si Nawin kawannyo tu.
pai ka bukik mancari ambacang, cando saisuak….. Ka batang aie mancakau puyu ‘gai…… Atau manembak balam jo katapel kadalam parak….. haaa, sabana banostalgia lah…….Di hari nan katigo, katiko panek bakuliliang kampuang, si Parudin jo si Nawin singgah ka Surau Tinggi tampaik awanyo mangaji saisuak. Lai tagok juo surau tu nampak, tapi lamannyo iyo agak kumuah….. alah banyak samak kuliliang surau tu.
Disuduik laman surau, nampaklah saurang anak bujang ketek sadang mamangkue-mangkue rumpuik. Si Parudin baranti cacah…..
- Namo ang si Fredy yo…?
Tanyo si Parudin ka paja tu. Nan paja tu, maangguak takuik-takuik…..(Paja-paja ketek dikampuang tu kini, tarnyato namo nyo Fredy, Jony, Martin…… Namo-namo ‘rang kini…. Kok padusi ado Madona, Hesty, Linda…. sagalo macam bagai……. Kamajuan tehnologi lo agak nyoh…..)
Si Parudin langsuang bisa manakok baraso paja ko lah nan maliang ayam, sahinggo kanai ukun dek nyiak wali untuak mambarasiahkan laman Surau Tinggi tu. Kecek si Nawin
kapatang, namo urang maliang tu Fredy……. Mako langsuang ditakoknyo…….Nan paja tu baranti bakarajo, mancaliak takuik-takuik ka si Parudin.
- Baa mangko waang surang sajo bakarajo ?
Tanyo si parudin icak-icak indak tau. Paja tu manakue
abih……… cando kamiluan.- Awak…… awak kanai….ukun pak……
- Baa
mantun? Baa mangko kanai ukun?- Iyo…… iyo….. awak……tacemo…..
- …….Iyo alahtu……alah tau den tu mah……
Tabik ibo lo si Parudin mancaliak paja tu katakuik an..
Sadang tangengak-ngengak tu, tangannyo diirikkan dek si Nawin maajak baganjue.
- Kan jaleh diang tu kini Parudin…..
- Aaa nan jaleh….?
- Baraso urang maliang tu, paralu juo ado dikampuang ko.
- Baa lo tu nan mungkasuik ang?
- Iyo…. Kok indak ado maliang nan kanai ukun doh….. ibaraik alah kabarimbo Surau Tinggi ko mah….. Antah kok indak tu di ang?
- Jadi kok indak ado urang nan kanai ukun….. indak bakamehi doh laman surau
nangko?Si Nawin manggeleang-geleang sapek.
- Daulu iyo lai nan namonyo kontoroyong,….tapi kini……. kok indak babaie, indak ado nan binamuah doh bakarajo…… Kacuali urang nan kanai ukun bantuak tu ha…..
Takana dek si Parudin…. Patuiklah labuah kampuang tampaik inyo balari-lari kapatang, alah samakin samak nampak,…… alah tinggi-tinggi rumpuik saruik disinan…….
- Syukurlah…..
Kecek si Parudin pulo……
- Baa mangko ba sukur ang?
Tanyo si Nawin lo.
- Aratinyo, kok barasiah labuah kampuang jo laman surau tu, …….tantu tando banyak urang maliang dikampuang ko mah…….. Kini dek surau jo labuah kampuang lai kumuah, aratinyo indak banyak urang maliang dikampuang ko…….
Dibaenyo galak gadang dek si Nawin……..Iyo pulo tu….Jadi jan sampai barasiah andaknyo kampuang…….yo ‘ndak? Ha,ha, hahe, he,……
- Kini co lah abang waang di mihrab tu lai ha…. Lah luhue hari ko mah…..Lai pandai juo ang abang? Taragak lo den madanga suaro ang…….
- Bato ka indak puloh……
Si Parudin jo si Nawin maambiak uluak di pincuran batuang dibulakang surau tu. Disinan pulo awanyo baduo saisuak mulo-mulo
baraja jo Angku Labai, …..baa caro maambiak uluak…. Sudah tu dibaenyo abang lai….. Iyo sabana mandayu-dayu, suaro si Parudin, malapeh taragak….. abang di Surau Tinggi….. bantuak saisuak…………….
Tidak ada komentar:
Posting Komentar